Sabtu, 28 April 2012

[[SUKU LAMPUNG]] PAK LUNEK BENU [CEKHITA BUNTAK]

Oleh Hasyim Krui




Pukokni kik aga sababalak awak makngedok sai dacok ngalahko Pak Lunek Benu. Kik adu ngicik iya layin begawoh. Injuk iya unyin sai calak. Injuk iya pandai unyin isini di dunia ji. Kidang duniani mak hak lebeh jak tukuni pekon seno do. Pukokni, ani jalma kamno, ancak iya ngunjakko kicik jak ngunjakkko jinjongan.

Unyinni jelma sang pekon adu jak diawakkeni. Kidang tanno ulun adu pandai unyin. Ulun adu pandai kakhtuni. Kik sa gila agi lamondo ulun sai tiangah ngedengiko kicikni. Agi lamon do ulun sai pekhcara. Ya tanno makngedok lagi sai nyemangokh keni. Ulun adu pandai unyinni. Makngedok pasni. Beladi sa’ayayapan khiya.Kidang injukni iya juga adu pandai jelma sang pekon mak aga lagi ngedengiko kicikni. Tanno kik ngicik jama jalma sang pekon iya mulai buyun-uyun. Halok mak mebangek lagi dikhasani kik dikemitko ulun.
 
Kidang dang cuba-cuba kik betungga jelma jak luakh. Jadi santapannido diya. Pekhnah waktu nyak mulang jak midokh, nyak menok Pak Lunek Benu lagi asik ngobrol di papanca jama jelma sai, induh jelma jak ipa bakas seno. Pak Lunek Benu sanemon bucekhita, bakas seno tiangah ngedengini. Kena niku mamak aku delom hati, sambil nyak liyu.

“Tiap khani ngia nyak nyumbangko khah-ku,” ani Pak Lunek Benu sai kudengi. Kiamat aku delom hati, kheno kik hibatni kudo. Tiap khani nihan iya nyumbangko khahni mik PMI. Kidang induh kuk iya pandai induh mawat khepa cakhani nyumbangko khah sa. “Sangun gaguwaiko do kik seno,” ani muneh. Mak dihakhi keni nyak lalang dilom hati. Keliwatan ‘awakni Pak Lunek Benu ji, aku delom hati.

Kadu mak saka jak seno bang bakas saiya singgah muneh di lamban, nanya bakku. “Bak lagi di sabah,” aku jama iya. “Kapan iya mulang?” ani. “Induh. Biasani dibi. Jam lima. Kak adu aga magkhib,” aku. “Payu kik kheno ucakko gawoh jama iya, Jemoh nyak khatong luwot,” ani. “Payu, Kemak gila tunggu pai, Halok sakhebok lagi iya mulang.” “Ikin gawoh ajo adu manom.”

Kak jemohni iya khatong do. Kebetulan bak lagi wat di lamban. Ya khadu jak basa-basi sekhebok khek ngenalko dikhini, bakas saiya nyampaiko maksudni. Ajo kheji pekni Pak Lunek,” ani jama bak. “Maksudku mik dija ji nyak aga katulungan. Kidang nyak ji makkik pandai ga ngicek. Mak nyak pandai cakhani kik aga bubasa-basi. Kintu tekhus tekhang gawoh, ajo sekam khua ji adu saka tibulamban, adu pitu tahun. Kidang makkung ngedok uleh. Makkung ngedok ketukhunan. Ajo kudengi jak Pak Lunek Benu di kabelahno, niku pandai ngelulahni. Ngilu tulung pai nihan ajo,” ani. 

“Kacah …” ani bak tikanjat. “Mak nyak pandai kik guwai makhaheno. Kintu guwaiku ji mik sabah, ngababalek duniaji, khek segok di lom pulan ji, ngekui batang damar. Mak nyak pandai kik aga guwai injuk kheno.” Ani bak muneh. “Adu diayabko Benu diya niku ji. Dang melamon ga ngicek jama Benu di. Iya di senangun gekhing ayayapan.” “Khiya kiya. Na api ngiya guwai sinji,” ani bakas saiya tikanjat. “Ngilu maaf nihan ajo Pak Lunek,” ani sambil iya nangguh mulang, khek busalam jama bak.

“Sikninani Benu,” ani bak, nginah bakas saiya adu lijung.

Tidak ada komentar:

Posting Komentar