Oleh Hendrik Semaka
Khadu setahun
mak mulang Pekon nyaniko
jippang ni cukut ku mak mingan legoh. Mawat kik tegakh buhung muneh ki nyak hambokh, dibbah jak
mubil jurusan Bakauheni -Kuta Agung. Tikham di unyin tiyan
dilamban,
Emak, Bak, Udo, dalih Ajjongku. Kipak
Udo jak nyilau Nyak di sebekhang kidang khadu pitu bulan say liwat. Khadu
tikham jama petuah dalih awak ni Udo. Nyak ingok bulan khuwah say liwat, Udo
ngebalos smsku: 'cengeng..!'. 'ija gelluk mulang, nyin niku sunat moloh..' padahal
nyak ikah sms: 'mak sabakh, nunggu bulan syawal..' ha.haa.. Sms na Udo, konyol
kidang mendidik. Hinnolah say nyaniko Udo 'kawan sekaligus lawan' ku di
lamban..
Alhamdulillaah
mulang Lebakhan
munyai khik mingan bupedatong jama Emak, Bak, khik Ajjong. Udo, sengaja mak ku
pedatongi injuk Lebakhan
tahun say liwat. Tagan, nunggu pengilu na gawoh. Pekhnah tumbay kupedatongi
kawai helau. Udo malah ngelelaju: 'tihakhiko, kak haga muloh mid Jawa, ngegadaiko Hp'. Nyaniko
kelalangan bingian takbiran lebakhan dinana. Semula jak sayya, mak lagi
kupedatongi. Bacak nunggu ia cawa. Sukukh ki ia bupungatu di-Nyak. Sejakh Nyak
di atas angin. ha.haa...
*Seminggu say liwat, sekhadu jak bagi
THR, lain hinjang atau ketupung say kubeli. Sekhadu jak ATM, Nyak langsung mid
toko alat rumah tangga, ngebeli batre atau senter say balak pakaina Ajjong.. 'nyin
tekhang, kak haga benyulu subuh di sumukh..' Hinno
alasan na Ajjong,
cawa Lebakhan tahun say liwat.
*Sampai di Pekon
khadu jak semahapan, Nyak langsung
mandi di kudan. Kekhasa iyos ni uway sumukh sanian na Among almarhum. Suakha
takbir khadu ketengisan anjak mesigid khik sukhau di Pekon Pekon. Udo, khadu lapah takbiran debingi pujama indai ni. Khadu jak balin
khik mengan nyak langsung ngakuk tas jinjing say pagun tekhogok di gekhil lemakhi di khedik mija TV. Bak mejong di sofa mak benni Emak luwakh jak dapukh ngebatok uway kupi dalih
gukhing hubi kedemonan ku. Ajjong pagun mejjong di ilat jak kati nyak tugok menggekhib kakhu..
Kubukak
resleting ni sambil
Nyak ngimut ngimut
haguk tiyan. 'Api
ano wih,..?' hani
Bak dalih ngelunik ko suakha TV
'pedatong laah..' haku. Kuluwakhi
sai-sai pedatong. 'Ajo
ketupung pakai na Bak' palas
nyak lapah ilung mija,
kuppik ko di gekhil ni pengajangan
nginum. 'Wah,
massa jatah moneh Bak. tekhima kasiih..' hani Bak dalih ngehikhus way kupi. Nyak
ikah senyum moloh mid tas,
Ku akuk sinjang say kubeli pakaina Emak. 'naa,
ajo sinji untuk Emak', kukeni ko di Emak say mejong ujukh2 di gekhil ni Ajjong. 'Api wi hak bupedatong juga, mak usah kik duit ni mawat..' 'aah, setahun pissan
Mak..' haku.
Nyak takhu
sekhabbok.. 'Ajjong mak massa' haku
bugukhau,
'aah, mak api api say penting niku munyai tuwah...'.
Nyak lalang, 'uwat
jong, khusus pengilu ni Ajjong tahun say liwat..' haku palas nyak muloh mid Tas. Kuakuk batre pakaina
Ajjong. Kukhatongi ajjong. 'api wii, pedatong di Ajjong..?' hana Emak,
penasaran. 'ajo ajjong, batre say balak sa.
Pakai ni
Ajjong kak haga mid sumukh, subuh'. 'owh, payu tuwah tekhima kasih' hana Ajjong
sambil miwang. Sedih menok Ajjong miwang. Ditambah suakha takbir say kasakh
khamik. 'Mak
api api Jong, Nyak kilu mahap Lebakhan say liwat mak laju
kubeliko..' Emak moneh miwang. 'acak kuti miwang lah Mak..? dalih ngelap luwoh,
liyom di Bak say pagun mejong disofa. 'Batre no segok ko gawoh..'. 'Ajjong mu
khadu mak menok lagi'. Hana Emmak. 'tawit Ajjongmu kik haga benyulu di
sumukh...' Nyak ikah tesundom, miwang...
*Mak tekhasa,
khadu pukul tellu subuh. Khadu lima jam Nyak ikah pepedoman
di kamar tenggalan. Pepikha
indai khatong kekikha jam sepuluh say liwat ngajak takbiran kidang mak kupayu ko. Suakha Hp pepikha
kali kebunyi kutaganko. Nyak ingok setahun say liwat, bingi ketellu Lebakhan, Ajjong cawa kebelian batre... 'Kik jimmoh mid pekan, tulung beliko Ajjong batre say balak
ya Tuwah..' kilu na
Ajjong. 'Ajjong kan khadu uwat batre,..' haku.
'iya, kidang kukhang tekhang, lunik ga..' hani Ajjong.
*Mak
benni Hp ku kebunyi,
kuliak jak indai di duwakha dunggak, 'Jadi mawat jimmoh kham memidokhan mid
Tekhbaya, sa..?'
suakha jak ujung Hp. 'Owh, ya jadi, jadi..!!' haku mastiko khencaka sikam, memidokhan. Khadu jak basa basi
telpon di tutup. 'iya Jong. Jimmoh
kubelliko..' haku
dinana. Kidang
hinnolah say jadi habaku. Togok Nyak moloh mid Jawa, mak juga Ajjong ku beliko
batre,..
*Suakha khangok
ni Ajjong kebukak. nyani nyak sadar anjak lamunan setahun say liwat. Kubukak
khangok kamarku pelegohan.. Kuliak Ajjong luwah jak kamar, ngekhaba2 di
sassai.. Sangun kutunggu subuh pissan jo. Haga nawit Ajjong mid sumukh. Kidang
cukut ku lemoh, tuwot ku mak butenaga.
Sedih, sesolan
cappukh jadi sai. "mahap ko uppumu,
Ajjong...''
Tidak ada komentar:
Posting Komentar